حواديت فوق جدران الانتظار
مستنيك ع البر التانى
قلقان انا عارفك متوتر
مرصودة الكلمة على سطرك
حيرانة خواطرك وعواطفك
بتصارع أمواج مجنونة
تتعلق بحنان متلون
بالغربة وبالليل الشارد
تتعلق بخريطة حلمك
وتاريخه المكتوب بهزايمك
فى حكاية العشق وفى الصمت
**********
مهزوزة صورتك فى اللوحة
المرسومه على وش المايه
ومهزوز الاحساس النابع
من وجع الصمت المتراكم
على شعر البنت المنكوش
*********
الآهة حدوتة عجيبة
بتلف خيوطها على قلبك
بتشدك من وهم الفرحة
من داخل أسطورة الفارس
وعرايس حوه الفترينة
تندهلك مش عايزة الرد
كراريس الواجب واللازم
والمفروض والجبر الأسود
مفتوحة ع الآخر دايما
تتكلم بيزلزل صوتها
أركانك وكيانك. عمرك
وطفولة قلب العصافير
يا صغير
انا عارفك جاهل
فى اصول اللعبة ومسلم
مفاتيحك للبعض ..الكل
الكل أنا أسف متلخبط
اللفظ ده خاين متعكر
بكوميديا سودا ملبوسة
فى اللعبة البايخة الممسوخة
على مسرح توهان وقلق
**********
مستنيك ع البر التانى
حاول تسبح
أضرب يدك شق المايه
أرفع راسك
قاوم كل الموج واتمسك
وأوعى تسير ويا التيار
عارفه انه معاندك ..ضدك
وكل حيتان البحر تشدك
للقاع المليان بالوحل
لكن …حاول
تسبح تانى
سيب إحساسك يقوى ..يعلى
يمحى جبل الداء الساكن
يكتب
الف ..ميم …لام
فوق السطر المطلى عطش
*********
مستنيك ع البر التانى
بشوق بينادى ع الفرسان
بقلب برىء وصغير جدا
بحلم البنوتة وحدوتة
لسه أمك بتحكيها وانت صغير
نايم جوه الحضن الدافى بتسمع
لسه شايفها
بترسم منك شكل نهار
تحكى وتحكى
كان يا ما كان
نام يا صغيرى
واديلك جناحين حمام
وكان يا ما كان
كان ياما كان
نام يا صغيرى
ن
ا
م
موضوع: حواديت فوق جدران الانتظار 
الثلاثاء 22 يونيو 2010 - 10:31
