للرقص أنواع وأهداف !!
ما ان اقتربنا من الخلية حتى فوجئت بمشهد رهيب سرب كامل من النحل يخرج من الخلية ويتجه نحوي مباشرةً
مبقتش عارف اروح فين ولا استخبى عند مين وقلت علطول أكيد أعضاء المنتدى همّا السبب حسدوني على العسل وشكلي كده مش هذوق غير قرص النحل بس ومش بعيد يكون حد بلغ ملكة النحل عني وقالها ان المراقب متنكر في صورة نحلة أو دبور زن على خراب عشه.
وقبل ما افكر اروح شمال او يمين كان سرب النحل احاط بينا على شكل دائرة وعمل كردون زي كردون الأمن المركزي بتاعنا بالضبط.
وفجأة لقيت صديقتي النحلة بدأت ترقص بحركات غريبة ومريبة
ووجدت مجموعة من النحل يبدو أنهم أعجبهم رقصها قد اقتربوا منها وبدأوا يُقبلون أقدامها !!
انتظرت حتى انتهت وصلة الرقص وبدأت جماهير النحل في مغادرة المكان ودار بيننا هذا الحوار .
قلت : يااااااااااه تصدقي الواحد غبي أوي مش عارف أودي وشي منك فين انا كنت فاكر ان في هجوم عليّا بس الحمد لله أنا كنت فاهم غلط أتاري سرب النحل كان جاي علشان يرحب بينا وانا مش واخد بالي أنا آسف جداً .
قالت : أنا اللي آسفة اني اقولك انك لسه مش فاهم أي حاجة خالص.
قلت : طب لو ما فيهاش رخامة يعني ممكن تفهميني .
قالت : أنا كنت بوضح لمجموعة الشغالات موقع و اتجاه الزهور والمسافة التي يبعدها مصدر الغذاء عن الخلية وحددت لهم أيضاً خصوبة وغزارة مصدر الرحيق وكذلك المجهود المبذول والوقت اللازم للوصول إلى مكان الغذاء واديتهم عينات من الرحيق اللي أنا جمعته علشان يتعرفوا عليه.
قلت : يا سلام كل ده حصل وانتي بترقصي طب ازاي !!!!!!!
قالت : ده موضوع يطول شرحه لكن باختصار الرقص عندنا هو لغة التفاهم وله أيضاً لهجات تختلف باختلاف طوائف النحل وكل حركة وكل وقفة ليها معنى كذلك نوع الحركة و زاوية ميل الحركة على الخط الواصل من الخلية الى الشمس بنعتمد عليه في تحديد الاتجاهات يعني مثلاً في الظروف العادية يتم اجراء الرقصات على الجانب الرأسي أو العمودي على الخلية وفى هذة الحالة يكون اتجاه النحل لأعلى فى اتجاة الشمس ويتم فهم كل الاتجاهات بهذا الوضع ، اى الطيران يكون فى اتجاه الشمس ، فاذا رقصت نحلة فوق الخلية بزاوية 20° يمين الخط الراسى مع الشمس فمعنى هذا ان الطيران يكون بزاوية 20° يمين الشمس وهكذا فى هذه الحالة فان الـ 360 درجة يمكن ان يتم توضيحها او عملها فوق سطح الخلية و يتم توضيح المسافة بواسطة الوقت الذى تستغرقة كل سلسله الرقصات التى يتم عملها وخصوصا الوقت الذى يتم فيه عمل الاهتزازات اثناء الجرى فى خط مستقيم والذى يرتبط اكثر بالمسافة او بالكمية من الطاقة التى يلزم انتاجها لاتمام الرحلة الى مصدر الغذاء .
انا طبعاً بلّمت و تنحت وخفت أقول اني مش فاهم حاجة لتاخد عني فكرة وحشة فكان لازم اتظاهر بالذكاء و بإني فاهم كل حاجة كويس جداً .
فقلت : آآآآآآآآآآآآآآه دلوقتي فهمت كل حاجة مش كنتي تقولي كده من الأول بس خلي بالك انا دارس فلك كويس وعارف ان قرص الشمس بيتحرك بمقدار درجة كل أربع دقائق ولو ما عملتيش حساب الموضوع ده ممكن تحصل لخبطة جامدة جداً والحسابات كلها تبوظ.
قالت : لولا اني عارفة انك ما تقصدش حاجة وان اللي في قلبك على لسانك يعني بتقول الكلام بسرعة من غير ما تفكر فيه كنت اعتبرت تحذيرك ده اهانة لا تغتفر في حق النحل ولا يمحوها الا القرص حتى الموت !!
ازاي تتخيل اننا مش عاملين حساب حاجة خطيرة زي كده ولازم نعمل حساب كمان حالة الجو و سرعة الرياح واتجاهها أثناء الرقص ...!!!
حاولت أغير الموضوع بسرعة علشان ما يظهرش جهلي أكتر من كده .
قلت : ممكن تديني فكرةعن باقي أنواع الرقص
قالت : انواع الرقص كتيره منها
الجري التصادمي Jostling run وفي الرقص التشنجي Spasmodic dance و في الجري الطنان Buzzing run
وفي الرقص التنظيفي Grooming (cealning) dance
وفي الرقص الارتجاجي Jerking dance وفي الرقص الارتجافي Trembling dance والرقص التحذيري Alarm dance و رقص الدفع Pull dance
وكل رقصة ليها طريقة وهدف والنحلة بترقص حتى وهيا بتموت علشان تحمي باقي خلية النحل .
قلت : أنا عارف اني تعبتك معايا علشان كده مش هسألك عن كل نوع وأهدافه ايه !لأن واضح ان الموضوع طويل بس ممكن تفهميني آخر جملة بس.
يعني ايه النحلة بترقص قبل ما ما تموت علشان تحمي باقي الخلية ؟!
قالت بنفاذ صبر : يعني مثلاً لو نحلة امتصت رحيق من زهور مصابة بالمبيدات السامة اللي بترشوها في كل مكان من غير حساب ولا تفكير وتبدأ النحلة تشعر بأعراض السم تسرى في جسدها لازم ترقص الرقصة التحذيرية اللي قلتلك عليها علشان باقي النحل يبعد عن الزهور دي وما يقربش منها يا ترى فهمت ولا لسة عندك أسألة تانية .
قلت : لا لسة عندي أسألة كتير طبعا بس ممكن اسيبك تشوفي شغلك وبعدين نكمل.
قالت : طب ممكن أسألك أنا ايه أنواع الرقص عندكوا وايه أهدافها
قلت : أنا معرفش غير الرقص الشرقي وده ليه أهداف مختلفة تماما عن الأهداف النبيلة اللي انتي ذكرتيها
وما زال للرحلة بقية ان كان في العمر بقية