المصري بيحب الناس وبيحب مصر

احبابي

كلمتين عن الشعب المصري

حلوين حبيت انقلهم لكم بالعامية

المصري هو اللي لو عمل حاجة حلوة يبعت لجاره طبق يدوقه ..

وهو اللي لو لقى الدنيا بتشتي يجري يخبط عليك يقولك لم الغسيل ..

وهو اللي لو شم عندك حاجة بتتحرق يجري يطمن عليك لا تكون اتخنقت ..

وهو اللي لو سمع صوت زعيق وخناق عندك يجي يصلح ..

وهو اللي لو لقى خناقة في الشارع يقف يحوش مش بس يتفرج ..

وهو اللي لو لقى حد بيغرق يجري ينط في الميه حتى لو هيغرق معاه ..

وهو اللي لو اتفرط منك كيس الجوافة في الشارع يقف يلم معاك ..

المصري هو اللي لو حس انك مزنوق يعملك جمعية مخصوص و يقبضك الأول ..

و هو اللي يقف معاك في الأحزان و الأفراح زي مايكون من بقية اهلك ..

و هو اللي لو لقاك في مواصلة و كان عارفك يحلف ميت يمين ليدفعلك الأجرة

حتى لو مافيش في جيبه غير نص جنيه ..

المصري هو اللي يقعد معاك ع الفطار في رمضان ..

المصري اللي يباركلك لما ابنك يجيب مجموع ويساعدك يجيبله شغلانة ..


طيبة المصري مش ممكن تلاقي زيها فى اي بلد تانية ..

اتحدى اى بلد فى العالم تكون كلها حلوة

ما هو فى كل مكان فى الحلو والوحش


طيب ما تيجوا نشوف الحلو اللى فى بلدنا وانتو تحكموا


ما تيجو نبص ليها بعيون حلوه

يا جماعه مصر بلدنا واللي قال انها امي وامك مكذبش

لاننا لو هنلجألها وقت الشده مش هتخذلنا

تعالو نحط ايدنا في ايد بعض

ونبقي أصدقاء

نبقي اصحاب

نبقي اخوات

نبقي اكتر من كده

ده احنا مصريين يا جماعه


علي فكره لا يقدر المرء قيمه الشيء الا اذا فقده

او زي ما بيقولو يعني هتبعد عن مصر هتعرف ازاي هيا غاليه واوى كمان


الاول انا كنت زي بعض الناس كده يفضلو يقولو في السلبيات

بس لقيت نفسي غلط ليه نقول عنها كده ولما احنا نقول كده

امال سيبنا ايه للتانيين

لا يا جماعه تعالو نرجع بالذكريات لورا

نفتكر اسعد لحظتنا مع جيرانا اصدقائنا واخواتنا

نشوف قد ايه احنا مش هنلاقي ده في اي بلد تانى

وعاوزين تعرفو اساللو مجربين ولو فضلت احكي واعيد واقول وازيد

مش هقدر اقول قد ايه مصر غاليه عندي وعندك


وهقولك ابسط دليل ان كل واحد فينا بيحب مصر بجد وكل الكلام اللى

بيقوله عنها ده مش من قلبه

انت لو اعد مثلا مع ناس جنسيات تانية ومن دول تانية ولقيت الناس دول

شتموا مصر وقالوا عنها كلام مش كويس انت هيبقى رد فعلك ايه؟؟؟؟؟؟؟؟

هتهزاهم وتقولهم دى بلدى محدش يتكلم عنها كده دى احسن بلد فى الدنيا

هتقول كده وانت مش قاصد ده حبها اللى جواك هو اللى خلاك تقول كده

ده مجرد مثال بسيط وفعلا يا جماعة والله مصر فى قلوبنا

منقول