ديوان الامير عبدالرحمن بن مساعد

ديوان الامير عبدالرحمن بن مساعد


( تـــــــعبت )



تعبت أنزف جراحي حبر و أدور للألم أسبـاب
لجل أكتب شعر يحكي بعض أصغـر معاناتـي
قفلت من الأسى بابي وسجنت الكون خلف الباب
وعصتني دمعـةٍ فيهـا سـؤال لكـل اجاباتـي
ملل أخبار حسّادي أحد صـادق وأحـد كـذاب
و أحد ما طال تجريحي و أحد عايـش لزلاتـي
أنا شاعر رغم أنف الحسد والحقد و الا حبـاب
وانا ياحاسدي المسكين بعيد العيب عـن ذاتـي
أنا ما زادنـي شعـري ولا زادتنـي الألقـاب
تجي دنياي أو تدبـر عزيـز فـكـل حالاتـي
أنا فرحي لمِن حولي وأيامي فـدى الاصحـاب
قصيدي بلسم المجروح ونبض النـاس أبياتـي
كسرني قلبي المكسور نـادت دمعـي الأهـداب
تعبت أركض ولا أوصل ولاتوصلنـي غاياتـي
أبي ذل ٍ يغطي الأرض لك يا رب يـا وهـاب
وابي أحيا جبيني فـوق مـا تملكنـي رغباتـي
من الدنيا أنا مابي سوى عفـو العلـي التـواب
ويحسن خاتمة فعلـي ويغفـر لـي ضلالاتـي
أبملا العمر "بالتوبة" و "نوح" و "هود" و"الأحزاب"
متى كانت سنيني عمر انا عمري في ركعاتـي

( عـيونـك )



عيونك اخر آمالـي وليلـي اطـول مـن اليـم
كيف القى كلام عذب يوصـف داخـل احساسـي
عشقتك قبل ماشوفك وشفتك صـرت كلـي حلـم
ابي رمشك يغطيني وابيك اقـرب مـن انفاسـي
يهمك تعرفـي انـك قتلتـي فـي سنينـي الهـم
قتلني ضحكـك وجـدك قتلنـي لينـك القاسـي
رميت اقداري في دربك وصرتي في عروقي الدم
احبك كثر ماسالت دموعـي ومـا نسـى ناسـي
يجول الحزن في ضلوعي بردت وذاب فيني العظم
كثير من الحطب حولي وعنـدك انكسـر فاسـي
سألتك بالذي زانك تحبـي فينـي حتـى الظلـم
تحبي عيوبي وغدري تحبي المـر فـي كاسـي
انا من كثـر مااحبـك ابيـك كثـر رمـل اليـم
وابيكي تكوني فوق الناس وابي ماينحني راسـي

( شبية الريح )

شبية الريح
وش باقي من الآلام
و التجريح
وش باقي من الأحلام
وش باقي من الأوهام
غير اني .. الاقي في هجيرك فيّ
الاقي في ظلامك ضيّ
و اوقد شمعتي في الريح
شبية الريح
اذا تسمح بغيب شوي
ابجمع همي الباقي
و ادفن صبري الذابل في أوراقي
و برجع لك اذا باقي بنفسك شي
شبية الريح
أنا مقدر أكدر صفوك العاصف
شبية الريح
أنا من لي سوى إحساسك الجارف
بقايا زيف أشواقي
سما أمطار أحداقي
شبية الريح وش باقي
ابي أعرف
متى تسكن رياحك
وابي أعرف
غرورك هو متى يطلق سراحك
و ابي أعرف
متى تعصف
متى تعطف
متى تنزف جراحك
و ابي أعرف
إذا باقي في بحرك موج اكسر فيه مجدافي
و ابي أعرف
إذا باقي في همك هم ماشالته أكتافي
و ابي أعرف
إذا باقي في هالدنيا حزن ما مرني و استوطن أطرافي
و ابي أعرف
إذا باقي من المعجز في هالدنيا
سوى العنقاء
و الا الغول
و الا خلك الوافي
بقايا زيف أشواقي
سما أمطار أحداقي
شبية الريح وش باقي ؟!
سنيني يم
و قلبي المركب المتعب و انت الريح
مجاديفي عذاب و هم
و زادي الوجد و التبريح
و صبري صبر بحّارة
بغوا في اليم محّارة
غشاهم موج كان من الغضب أغضب
و كانوا للهلاك أقرب
لولا كثروا التسبيح
شبية الريح
حبيبي الأصدق الأكذب
عجزت اوصل شواطي طبعك الأعذب
تعبت أنطر في وسط العاصفة
قلب و شعور و عاطفة
تعبت أجمع ألم كل الموادع
في المواني و أحضن أطيافك
تعبت السهد في ليل الشوارع
و الثواني تنطر انصافك
تعبت الظلم و اجحافك
شبية الريح
أنا ودي أكدر صفوك العاصف
شبية الريح
أنا كني نسيت إحساسك الجارف
بقايا زيف أشواقي
سما أمطار أحداقي
شبية الريح
كيف أسألك : وش باقي ؟
وأنا الباقي من إحساسي
ذرته الريح

( مــــساء الـــخير )




مساء الخير والإحسـاس والطيبـة
مـسـاءٍ مايلـيـق إلا باحبـابـي
مساءٍ غير غصـن لطيـر يحكيبـه
عن اللي مسكنه جفنـي و أهدابـي
هـلا باللـي أحبـه كثـر تعذيبـه
و كثر ما هو يغيب و كثر ترحابـي
حبيبي هو و لو مـا قصّـر الغيبـة
و لو عن بسمتي قد طـوّل غيابـي
أعرفـه زيـن وعيتنـي أساليبـه
عدوي يوم و يوم أقرب من أصحابي
ملكنـي بيـن ترغيبـه و ترهيبـه
يفارقني و هو واقـف علـى بابـي
به الصادق بـه الغـارق باكاذيبـه
يبي بعـدي و دمعـه بلـل ثيابـي
به القسوة بـه الرقـة بـه الهيبـه
به الضعف القوي به نشوة أغضابي
هلا باللي يصيب العطـر بالريبـة
يقول العطر أنـا زايـل و يبقابـي
هلا باللي يقـول الـورد وش ليبـه
من المهدى ؟ أنا أو هـو لأطيابـي
هلا باللي عجزت ألقـى عذاريبـه
هـلا باللـي تحبـه كـل أسبابـي
مساءٍ فـاق كـل الشعـر ترحيبـه
بجية من سكـن جفنـي و أهدابـي
مساءٍ فاض بالإحسـاس و الطيبـة
مسـاءٍ مـا يليـق إلا باحبـابـي

( يــــسعد صباحـــك )

يسعد صباحك .. يا حبيبي
حالي طيب
كل شي مثل اللي كان
المدامع .. والمواجع ..
والأمان اللي اختفى لحظة غيابك
والليالي اللي مضت .. مثل الليالي اللي مضت
الهم عازف .. والدمع نازف ..
والعمر في غيبتك حاير وخايف
حتى جراحك وسط قلبي مثل ماهي
وفي شفاهي باقيٍ نفس الكلام اللي بقى .. آخر لقا
مثل منتَ يا حبيب الروح شايف
كل شي مثل اللي كان
وحالي طيب
يسعد صباحك .. يا حبيبي
هذا انت
كل ما ضاقتبي الدنيا تغيب ...
وكل ما ضاقتبك الدنيا تجيني
هذا انت
ان كساك الهم صرت أوفى حبيب
وان نساك الهم تتباهى بـ أنيني
مثل منت .. دايم تجي فـ وقتك حبيبي
بعد ما وقتك يروح
يا آخر دموعي وشجوني ..
وأول إحساسي جروح
ما بقالي من عذابي يا حبيبي .. الا انت
وهذا انت يا حبيب الروح شايف ..
كل شي مثل اللي كان
وحالي طيب
يسعد صباحك .. يا حبيبي
هذا ضي الصبح .. او هو بعض نورك ؟!هذا همس الورد .. او دافي شعورك ؟!
منهو مثلك في غرورك ؟!
جيت متأكد بسامح ..
راسم الطيبة ملامح
ماهو بدري !! ..
انت تدري
ما قتلني غيابك اكثر من حضورك
ايه كان العمر داكن ..
ايه كان الهم ساكن .. وقتي بعدك
بس أنا يا ضيّ عمري ..
كنت عودت الأماكن تألف بعادك وصدك
ياللي ما يرضيني ضعفك ..
ما ادري انثر فوق كتفك أغلى دمعي .. او أردك

( الــــبرواز )




قلتي لي نسى
ومن يومها وانا كل ليلة .. قدامي البرواز
حبر العيون ودمع القلم .. في دفتري
وصورتك .. رغم الألم .. ورغم انها خذت من اطباعك كثير
وخانت البرواز .. اشوفها في خاطري
حبيبتي مابيدي حيلة
لاصرتي الصورة .. وعيوني البرواز
وشلون ابنسى

اتعبتي الصورة مشاوير
وتعبت انا بلقى لغدرك معاذير
وصورتك اللي سجنت بروازها طول السنين ..
كانت جسد وبروازها الروح
ويوم انزعت منها الجسد .. تجرّحت اطرافها
وبجروحها راحت لمين ؟
لبروازها الثاني !!
مسكين .. بيسجنك ويبقى سجين
مسكين
تشبهلك اقداره .. خانته
وصورتك يجي يوم وتخونه
حبيبتي ..أو للأسف حبيبته
لاصرتي الصورة .. وجفونه البرواز
وشلون ينسى ؟!

حبيبتي لجل انسى جرحك واستريح .. ببكي
وبعد البكى .. ببكي
وأكيد فيه لحظة بتجي .. وبيجف دمعي
وعندها صورتك اللي في عيوني
بتموت من ظلم العطش ..
بروازها بيصبح نعش
وبتمرني الدمعة الأخيرة ... تاخذ معاها صورتك وتطيح
وكني بالمسافة تطول مابين عيني .. ودمعتي .. وخدي
وكني بقلبي الحاير المسكين
نبضه يقول لا تودع الفرقى .. الدمع مايرقى
وعندها لانزلت الدمعة لمثواها الأخير
وفارقت وجهي
بغمض عيوني .. واكسر البرواز
وانسى

( رسالة إلى حبيبته )
إنه أمامي .. العاشق الأصدق
في صمته المُدوي .. يبُثني شكواه
إنه يحب .. وحبه في هذه الدنيا
هو الأصدق
إنه أمامي .. يا لها من نظرةٍ حزينة
تحجب النهار .. تطل من عينيه
يا لها من وجنتٍ في دمعته
يقرأ في ملامحها الضياع
كأنها بحّار قد اٌنسي العوم
ومن حوله تنهد الموج
ولا يرى مرساه
إنه أمامي ساءت في طباعه .. الطباع
لا يقبل اللوم .. يبكي على ليلاه
إنه أمامي يا لها من قصةٍ حزينة
تطل من عينيه
تطل من عينه تلك .. سنينه العجاف
والذكرى
وتلك التي أحبها .. سنين
تلك التي رمت به في البحر
ومع غيره ركبت سفينة
وتركت له المجداف للذكرى
أحمق
يا له من أحمق هذا الذي أمامي
العاشق الأصدق
لها هذه الرسالة
لمن علمته الصبر والغضب
لها لعلها تلقى من الإحساس ما يكفي
لكي ترثي حاله
لها لعلها تعلم إنه إن أدبرت
أو أقبلت هالكٌ .. هالكٌ
لا محالة
لمن علمته الصبر كتبت هذه الرسالة
كتبتها ألقيتها في ماء هذا الغاضب الأزرق
في البحر
كتبتها كي أنقذ الأصدق
هذا الذي أمامي العاشق الأصدق
كتبت في الرسالة .. تحياتي حبيبته سلامي
إنه أمامي .. له من المتاعب ما يكفي لكي يعشق
فجرحيه بأن تريحيها .. له روحٍ أبت إلا على يديك أن تزهق
فقتليه بالرحيل .. أو تعالي وأزهقيها
لمن يحب كتبت هذه الرسالة
فعلت ما علي كتبتها .. ألقيتها
في ماء هذا الغاصب الأزرق
في البحر
هذا الذي أمامي العاشق الأصدق
يا صاحب لا اعرفه في الشاطئ الآخر
لربما ستلقى ما كتبت
لربما ستقرأ الرسالة
اقرأ من الأخر .. إن كنت تعرف من يحب
خذها لها .. وقل لها إن الذي أمامي
لا.. لا.. لا
يا صاحبا لا اعرفه مزّق الرسالة
مزق الرسالة واضحك على المأساة
اضحك على المأساة
عرفت من أمامي .. إنها المرآة

( ســــألتهــا )


سألتها ..
لية البحر ساكن عيونك ؟!
جاوبتني .. للغرق
سألتها ..
ليه السواد اللي في عيونك ؟!
جاوبتني .. للأرق
سألتها ..
ليه الخدود ؟
قالت .. عبق
سألتها ..
هي رقتك مثل النسايم و الورود ؟!
قالتلي .. لا .. يمكن أرق
سألتها ..
عن حسنها كنّه يقول : ما للشعر فيني حدود ؟!
قالت .. صدق
سألتها ..
يا اغلى الأنام .. و شهو الغرام ؟!
قالتلي .. انك ماتنام .. و أوهام .. و تنتظر شمس اللقا
و ماتجي شمس اللقا
مشوار مايعرف وصول .. و لحظة بها كل الفصول
و قلب واحد يحترق .. و بعض الصدق
وقتٍ عصيب يتبعه وقتٍ عصيب
و ليل يتعدى الصباح ..
وجراح تدمى لو تطيب
و في الأخير ..
خل عن خل افترق
في الأخير .. كل النهايات الفراق
ما فيه فرص ..
ما فيه نهايات بلقا .. إلا في خيالات القصص
سألتها ..
و شهو الوفا ؟!
قالت .. كفى ..
النور من ضيي اختفى
و الليل في عيوني غفى
اترك كثير الأسئلة ..
اسأل عن عيوني و كفى
اسألني .. ليه البحر ساكن عيونك ..
ليه السواد اللي في عيونك
سألتها ..
جاوبتني .. للغرق .. للأرق
سألتها عن حسنها كنه يقول : ما للشعر فيني حدود ؟!

قالت .. صدق

( ســـيد جـــروحـــي )




سيد جروحي شمس عمـري و ظلـي
البعد طـوّل و الخطـأ منـك واضـح
اذا غـرورك يمنعـك تعتـذر لــي
تعال جنبي و ابتسـم لـي و اسامـح
تـدري احبـك لكـن المـوت ذلّـي
ادوس انا قلبـي لـو الشـوق جامـح
الله عطاك الحـظ و اصبحـت خلّـي
و الله عطانيـاك طـاغـى مـلامـح
سألتنـي يــا ياسميـنـي و فُـلـي
يا كيف يشفى الورد .. و الشوك جارح
مثل العيـون اللـي لهـا كـل كلـي
زايـد حلاهـا لكـن الدمـع مـالـح
وش تنتظـر يكفـي دلال و تغـلـي
الوقـت ماهـو للوصـل دوم سانـح
ما دمـت ترحالـك و مادمـت حلـي
ان صرت انا خسران ماصرت رابـح
لا تعطـي الفرصـة لعذالنـا الـلـي
لكل مـا هـو يهـدم الحـب طامـح
مالك صبـر عنـي و مالـي تسلـي
والوقت خيل صـوب الآجـال رامـح
سيد جروحي شمس عمـري و ظلـي
الحب بعد و قرب .. مخطي و صافح
اذا غــرورك يمنـعـك تعتـذرلـي
لا تعتذرلـي قـول اسمـي و اسامـح

( دخــــون )


هو فيه مثلك..ياللي الحسن ظلك
ليه العطر
وانتي انفاسك دخون
وليه الكحل
وانتي ماغيرك عيون
وليه تفكيرك يكون
انك تكوني دايم اجمل
انتي اجمل
من جمالك
من دلالك
من خيالك
ياللي كل افراح قلبي والحزن
في المسافة بين فرقاك ووصالك
وليه يالقلب الحنون
تاخذك فيني الظنون
ضيعتي عدلك..هو فيه مثلك..انتي ماغيرك عيون
وانا احبك .. وانتي انفاسك دخون
ياللي احبك..ليه احبك؟
او ليه ماحبك..وانتي علمتيني ان الحب كله اسئله ما تنتهي
ليه ما احبك وانتي علمتيني ان الحب لا غدا لمثلك ابد ماينتهي
ياللي علمتك عذابي والهجر..ليه ما احبك
ياللي علمتك تكوني..في ضعف ضعفك..اقوى مني
يا انتي ضحكاتك تغني..وابتساماتك شعر
يانتي ضحكاتك تغني..وكل ما شفتك اصر
انك اجمل من جمالك..من خيالك..من دلالك
على حبك انا..بقفل ابوابي
وبطيوفك انا..باسقي اهدابي
يا انتي..يا انتي احبابي
تصدقين..تصدقين..صدقي
قلبي لكي وحدك..صدقي
ماقوى على بعدك دقايق..بس دقايق
ياظلي .. يا داري
يا اجمل..افكاري..تظلمني لوتقولي اني عاشق..بس عاشق
ياللي وحدك تسمعي صمتي وكلامي
ياللي ضيك
..اتعب همومي وظلامي..صدقي اللي في قلبي لكي
اكبر افكار من القصيد والحكي
تصدقي انك اجمل في عيوني من جمالك من خيالك من دلالك
لا يالقلب الحنون لا تاخذك فيني الظنون

(( نبض الشوارع ))

ماغدا للوقت معنى
ما بقى للشعر دافع
ملت آلامي حروفي ومل صدري من الضلوع
غصت في أعماق روحي خذت نبض من الشوارع
يمكن ألقى أي معنى يوقد لشعري الشموع
صرت أراقب كل ومضة وأرخي للهمس المسامع واحتري قلوب تسافر من قساها للخشوع
والتقيت الظلم لذة في البشر والعدل ضايع
والتقيت من المشاعر كل صنف وكل نوع
به قلوب ياه تشقى لو يبات الحقد جايع
وبه قلوب لو هي تقوى ما بقى في الدنيا جوع
وبه عيون في هدبها تسكن آلام ومواجع ومن سواد اليأس فيها ما قوت تذرف دموع
به فقر مدقع يبكي
به غنى فاحش ورائع
وبه بخل ظاهر وشامل
وبه كرم لكن قنوع
وبه بشر تنسى صلفها ان كل من راح راجع
وبه بشر تنطر اجلها ترتجي ذاك الرجوع
به مسلي طول ليله بكل ما مولاه مانع
وبه مصلي ذاب ليله في سجوده والركوع
به كساد
به فساد
به طموح
وبه مطامع
به بطالة
به سفالة
وبه مخادع ومخدوع
وبه اسى غطى الحناجر
وبه كدر قظى المضاجع
وبه هروب للتطرف ولا لغياب وهجوع
به دجل يملىء الحواري
به كذوب في الجوامع طول اللحية لسلطة ما هو سنة ولا طوع
به نفاق وفاق حده ما لقى في الناس رادع
به صدق موجود لكن مهمل وماله شيوع
به شعوب ضاع املها تكره الفعل المضارع تلقى في الماضي عزاها أما حاضرها يلوع
به تعاسة وانتكاسة
به ظلام ما يمانع يقتل اخر ضي فينا وشمسنا تنسى الطلوع
به كآبه
به سحابه غيثها دم ومدامع
به مهانة واستكانة
به مذلة
به خضوع
به ليالي ما تبالي لو تجينا بالفواجع والحزن فيها مثالي واصل ما هو قطوع
وش بقى في العمر معنى
وش بقى للشعر دافع
وكل ما سالت حروفي ضافت بصدري الضلوع






مما راق لي

• كأس ولي العهد 2 / 3 / 1430 هـ

• الدوري السعودي للمحترفين 9 / 2 / 1431 هـ

• كأس ولي العهد 5 / 3 /1431