ا بيات ابوذيه مع اسماء كاتبيها

سمير صبيح
انة من الجرح ماخاف .. لوسال
يراه شامت واخاف شلون لوسال
سيفك بالجذب لعداي .. لوسال
علي هد واكولن هد الية
ـــــــــــــــــــــــــــــــــــــــــــــــــ
نور اللامي
وكان شعجب زعلت .. من ايّان
وشوف شصار بية .. من ايانة
انة شعجب يزعل .. مني انة
وعلية شعجب يزعل من علية
ــــــــــــــــــــــــــــــــــــــــــــــــ
صباح الهلالي
انة الما يوم عاذل .. ملكيتة
وابد ما امل زماني .. مل لكيتة
يريدوني اهدّة .. من لكيتة
اعمة وجلبّت شيفك ايدية
ــــــــــــــــــــــــــــــــــــــــــــ
نور اللامي
انة من سنين احبك .. هايم انة
وكل حسرة بدليلي .. هايمانة
يكلبي انطيني جفك .. هاي امانة
حبيبي بمهجتك ضمّة الية
ــــــــــــــــــــــــــــــــــــــــــ
عطا السعيدي
منهو الكدرك يا زين ..من ساك
يبو ثغر البعود الارك .. منساك
انة بحتف المناية وكلت .. منساك
بنهر جسام وذكرك عصف بية
ـــــــــــــــــــــــــــــــــــــــــــ
رحيم المالكي
زماني بفركتك حزين .. حزنة
وعلى كل الحزن والنوح .. حزنة
تعال على الدليل وشوف ..حزنة
مغيم ما صفة ومخبوط ميّة
ــــــــــــــــــــــــــــــــــــــــــ
احمد الذهبي
وحك هموم البصدري .. والاكراب
الماي بغيبتك صدك .. ولك راب
الي رب اليصبرني .. وألك رب
اليفجعك بالعليهم خنت بيّة
ــــــــــــــــــــــــــــــــــــــــ
احمد الذهبي
تحن الروح كلساعة .. ترف لاك
ومشيت وظلت عيوني .. ترف لك
اذا ما جيتني الليلة .. ترة أفلاك
اسوي وجاينة انصب علية
ــــــــــــــــــــــــــــــــــــــــ

رحيم المالكي
شنفعني الجو يا صحاب .. من خلالي
اخذ ربعي واخوتي .. من خلالي
كثيرة ذيول عبرت .. من خلالي
الزلم واشباههة عبرت علية
ــــــــــــــــــــــــــــــــــــــــــــــــــ ـ
رحيم المالكي
انة المكسور دومي .. من لحمني
اسد خيوط ربعي .. منلحمني
ابي وما كلت روحي .. من لحم ني
تلحك تستوي وتنطيهة ادية
ــــــــــــــــــــــــــــــــــــــــــــــــ
احمد الذهبي
روحي من المصايب .. ناخ ذلهة
شفت عزهة بمذلة .. ناخي ذلهة
اكو وادم تحية .. ناخذلهة
وهي الجتالنة تاخذ تحية
ـــــــــــــــــــــــــــــــــــــــــــــــــ
رحيم المالكي
سلطان على روحي .. من يعللك
يالعاذل بهمي .. من يعللك
لا تمن بدهرك .. من يعلك
ترة بنفخة هوة ترد للوطية
ـــــــــــــــــــــــــــــــــــــــــــــــ
احمد الذهبي
علي ما افضل احد .. وانتة افضلك
واهد وافزع واثورن .. وانتفض لك
يبيك شلون خانوا .. وانتة فضلك
عليهم مثل فضل امي علية
ــــــــــــــــــــــــــــــــــــــــــــــ
محمد الغريب
كلبي ما لعب غيرة .. لعابة
واحسن شفة لامراضي .. لعابة
سبحان الذي صاغة .. لعابة
ونفخ بي روح حتة يعم علية
ـــــــــــــــــــــــــــــــــــــــــــــ
محمد الغريب
يمن وجهك بنص الليل .. لالة
شنو امك بالنساوة اشتهت .. لالة
من اكرّب ليك ليش تصيح .. لالة
خايف لا تموع ابين ادية
ـــــــــــــــــــــــــــــــــــــــــــــ
محمد الغريب
امش مملوح غيرك .. يمشي فاهي
وعجز يوصل الوصفك .. يمشفاهي
لون تدنة شفاهك .. يم شفاهي
الزك من تحط جيلات بية
ـــــــــــــــــــــــــــــــــــــــــــــ


محمد الغريب
وحجابك هذا لو قطعة .. من الغيم
ويحفظك يا ترف ربي .. من الغم
دكضني خلصت كصتي .. من الغم
من اشوفنك تصير جنون بية
ــــــــــــــــــــــــــــــــــــــــــ
محمد الغريب
من الفرح ما ظل .. شايبانة
ووكتنة من زغرنة .. شايبانة
تشوفيني يعمي .. شايب انة
ابيض راسي بس روحي طرية
ـــــــــــــــــــــــــــــــــــــــ
رياض الحار
صفنتلهة وضربت اخماس .. بسداس
وتعبت على البنيتة وياك .. بسداس
صحيح انة لعبت وياك .. بس داس
غلبتني بطيبتي العمت علية
ــــــــــــــــــــــــــــــــــــــــــ
رياض الحار
هاك خيوط روحي .. هاك ابرهة
ولو صاير بحرهة .. هاك برهة
الك حسرة بدليلي .. هاكبرهة
علي ثكلت مثل ثكلك علية
ـــــــــــــــــــــــــــــــــــــــــــ
جبار رشيد
طلبتك ما كلتلي ابشر .. ولا هاك
شلهاك وغيرك عني .. ولهاك
ضميرك لازم يألمك .. والهك
هم يحاسبك باجر علية
ــــــــــــــــــــــــــــــــــــــــــ
فاضل كريم
وكلت مرخوص فوك الجسد .. عدي
وجم مرة تزل ونكول .. عدي
احس مرات كل الصوج .. عدي
انة الغلطان رهّيتك علية
ـــــــــــــــــــــــــــــــــــــــــ
ـــــــــــــــــــــــــــــــــــــــــ
جبار رشيد
وثيقة بكل فخر كلبي .. وثقلاك
جبل ما شفت باخلاقك .. وثقلاك
الك يرخص دمع عيني .. وثق لك
الكلب لمن يدك يوكع بدية
ـــــــــــــــــــــــــــــــــــــــ
مجهول
صار الكلب كاسك .. وانتة كاسة
والميحبك خسارة .. وانتكاسة
لو العب ابدوري .. وانتة كاسة
اشيلك حتة لو خسران مية
ــــــــــــــــــــــــــــــــــــــ


جبار رشيد
هاك اشعل كلب كلبي .. ووج هاك
على حالي راح اعلمنك .. ووجهاك
بشالك من تلف شعرك .. ووجهاك
تلف روحي مثل لف المنية
ـــــــــــــــــــــــــــــــــــــــــــــ
رياض الوادي
اعترفت بعضمت لسانك .. وقريت
شمالك عتعتت هسة .. وقريت
انة العلمتة القراية .. وقريت
وهسة يريد يقراهن علية
ـــــــــــــــــــــــــــــــــــــــــــــ
رياض الوادي
عمري تيهيتة وضاع .. سني
كبرت وطاح من كدامي .. سني
شيعي وجيف احبة صرت .. سني
وتيهت الخمس والمرجعية
ــــــــــــــــــــــــــــــــــــــــــــــ
رياض الوادي
مجلّب لا رضة يهدني .. ونهدة
ولا ساعة الرضة نكعد .. ونهدة
ابوس بي من شفتة .. ونهدة
وصلت للصدك بدل علية
ـــــــــــــــــــــــــــــــــــــــــــــ
رياض الوادي
تعال اكعد نصفي الألك .. واللي
وعلية النوب ياهو تريد .. ولي
كلتلة خل ابوسك كال .. ولي
شنو تبوسني تنّك علية
ـــــــــــــــــــــــــــــــــــــــــــ
لا تنسونا من خالص الدعاء

اخوكم خالد العراقي- الانبار

مشكور استاذ احمد لمرورك الكريم تقبلي تحياتي وامتناني لك اخوك خالد العراقي